Búðarverkefnið

Eitt af verkefnum Átthagafræðinnar í GSnb er svokallað Búðaverkefni sem tilheyrir námskrá 8. bekkjar. Um er að ræða samvinnuverkefni Grunnskólans, Soroptimistaklúbbs Snæfellsness, Svæðisgarðsins Snæfellsness, Þjóðgarðsins Snæfellsjökuls og Hótels Búða. Nemendum er boðið í sögugöngu og strandhreinsun um friðlandið á Búðum. Þeir njóta sagnasnilli Ragnhildar Sigurðardóttur frá Svæðisgarðinum um sögu Búða, náttúruperlur á svæðinu, Axlar Björn og Guðríði Þorbjarnardóttur víðförlustu konu heims og fleira. Auk þess fá nemendur kynningu á Þjóðgarðinum og starfsemi hans. Gengið er út að Frambúðum og í bakaleiðinni er allt rusl hreinsað úr fjörunni og á svæðinu í kringum göngustígana. Í lokin er svo öllum þátttakendum boðið í súpu og brauð á Hótel Búðum. Verkefnið hefur frá upphafi gengið mjög vel, nemendur hafa verið iðnir og áhugasamir.